Azərbaycan mədəniyyəti bu dəfə Netflix -də!

Gözlənilən an gəldi! Netflix “Drive to Survive” serialının 7-ci mövsümünü təqdim etdi. Azərbaycan mədəniyyəti növbəti dəfə qlobal yayım platformasında yer aldı.

Dramatik anlar, pərdəarxası rəqabətlər və yüksək adrenalin yaşadan “Drive to Survive” təkcə avtoidmandan bəhs edən sənədli filmi deyil, Formula 1 dünyasının ən nüfuzlu komanda və pilotlarının həyəcan dolu həyatına bir səyahətdir. İlk dəfə olaraq serial trekdən kənara çıxaraq paytaxtımızın füsunkar mənzərələrini, rəngarəng mədəni irsimizdən  görüntüləri yayımlayır. Qeyd edək ki, Netflix komandası çəkilişi Bakı Şəhər Halqasının texniki dəstəyi ilə həyata keçirilib.

Serialda Bakı yarışını bu qədər detallı təsviri təsadüfi deyil. Gözlənilməz nəticələri ilə azarkeşləri sona kimi həyəcanda saxlayan yarış, məşhur Drive to Survive sənədli serialında da əks olunaraq, Formula 1 həvəskarlarına Azərbaycan Qran Prisinin gərgin və dramatik anlarını bir daha yaşadır.

Bu mövsümdə 2024 Formula 1 mövsümünün gərgin mübarizələri, Maks Verstappen-in çempionluq uğrunda əzmkarlığı, Red Bull-un üstünlüyü və komandalar arasındakı gərgin rəqabət tamaşaçılara təqdim olunur. Hər mövsümdə olduğu kimi, bu dəfə də serial trekdə və trekdən kənarda baş verən hadisələri, sürpriz transferləri və dramatik məqamları tamaşaçılara çatdırır.

Siz də bu həyəcanı qaçırmayın! Netflix-də “Drive to Survive” yeni mövsümünü izləyin, möhtəşəm sürət yarışının pərdəarxası tərəflərindən xəbardar olun!

19-21 sentyabr tarixlərində baş tutacaq Bakı yarışının adrenalini indidən yaşayın, ekranlara yaxın əyləşin.