Marşallıq fəaliyyəti hər bir şəxsə ölkəmizdə keçirilən və dünyanın ən maraqlı idman növlərindən biri olan Formula 1 Qran-Prisinin vacib tərkib hissəsi olma imkanı qazandırır. Yarış rəsmisi kimi marşallıq fəaliyyəti kollektiv düşüncə və komanda işinin təşkilinə dair bacarıqların daha da təkmilləşdirilməsinə xidmət edir.

Formula 1 yarış həftəsonunu uğurla başa vuran hər bir marşala Azərbaycan Avtomobil Federasiyasının təqdim etdiyi və Beynəlxalq Avtomobil Federasiyası (FIA) tərəfindən qəbul olunmuş beynəlxalq lisenziya verilir. Bu lisenziya marşallara təkcə Azərbaycanda deyil, həm də Formula 1 Qran-Prisi və digər avtoidman yarışlarına ev sahibliyi edən ölkələrdə keçirilən yarışlara qatılmaq hüququ verir.

21 yaşından yuxarı hər kəs marşal ola bilər. Bunun üçün sizdə xüsusi bacarıqların olması vacib deyil, əsas olan yarışın bir hissəsi olmaq arzusu və bir də özünüqoruma instinktidir, çünki təhlükəsizlik marşal işində ən vacib elementdir.